خلق الله آدم أولاً ، ورأى أنه ليس حسناً ان يعيش آدم وحده فأوجد له حواء ، وانبهر آدم بتكوين حواء الرائع الذى يختلف عنه ، وكان الاثنان عراة تماماً ولم يشعرا بخجل أوعار أو أى عورة . لأنهما لم تمسهما خطية ، وعاشا فى سلام وسعادة واحترام نفساً واحدة وجسداً واحداً إلى أن جاء يوماً هبت فيه العواصف وقلبت البشرية .
اليوم الأول
حواء : أين كنت يا آدم ؟ ...
آدم : أتمشى فى الجنة ..
حواء : كل يوم يا آدم ؟ ...
آدم : أتفقد أحوال الرعية ...
حواء : أية رعية هل هناك إمرأة غيرى ؟ ...
آدم : وهل هناك إمرأة غيرك أوجدها الله !! ...
حواء : لا أعرف . فكل شئ مستطاع عند الله ويبدو فى عينك أنك تبحث عن شئ آخر
وأراها دائماً زائغة ...
آدم : لماذا هذا الشك يا حبيبتى . لم أعهده فيك من قبل ..
حواء : إذا المساواة تجعلنى أفعل مثلك ..
آدم : أخاف عليك ..
حواء : مما تخاف ؟
آدم : لأن هناك شبه اختلاف ..
حواء : ما هو الاختلاف ؟
آدم : العاطفة والعقل ، ولكن الحب يمحو أى اختلاف ...
حواء : لو بتجيب سيرة الحب . رجلى على رجلك وشاركنى كل حاجة .
آدم : خليك عاقلة ..
حواء : قول حاجة غير كده ..
آدم : ما ينفعش. شغلى يحتاج راجل ..
حواء : وأنا كمان عندى شغل ..
آدم : وايه هو الشغل ؟
حواء : أوجد أجيال يحملوا اسمك . فيه أكثر من كده شغل
آدم : أشكرك يا حواء . سوف أعترف بهذا ، ولا أضمن من يأتى بعدى يعترف بهذا الجميل
حواء : لا أريد الشكر بل أريد أن تحترمنى وتقدر مشاعرى وتكون بجانبى وأنا جنبك اللى خرجت منه .
آدم : ايه المطلوب ؟
حواء : فيه أسرار كثيرة متعرفهاش ولازم يكون لينا السيطرة الكاملة على كل كائن حى ، ولازم نضمن مستقبل اولادنا .
آدم : خلينا فى الستر ، كل حاجة فى ايدينا ايه اللى ناقص .
حواء : انت معندكش طموح ، بس عايز تتسكع على مزاجك
آدم : انت ناوية على ايه ؟
حواء : الصباح رباح ، وكل شئ متاح ...
عشان قلبى يرتاح هبى يا رياح ..
آدم : يا ربى أنا غلبان . من حواء انا تعبان ..
لا قادر على بعدها ولا متحمل قربها ..
مش عارف أنزل لعقلها ولا عارف أوصل لقلبها
خايف عليها من الشيطان يقلب حياتها بركان
اليوم الثانى
حواء : مين هناك ؟
الشيطان : أنا يا حواء ..
حواء : انت مبن.هو فيه راجل غير آدم هنا ؟!
الشيطان : لا يا حواء .. أنا لسه نازل من فوق ...
حواء : وايه اللى جابك هنا ؟
الشيطان : أنا سمعت فيه خلافات بينك وبين آدم قلت اصالحكم على بعض .
حواء : وايه اللى تقدر تعمله مع العقل لما يتغير .
الشيطان : أنا أقدر اللعب فى أعظم العقول . بس مش كل العقول .
حواء : ايه العقول اللى تقدر تلعب فيها .
الشيطان : العقول المطيعة والفاضية أقدر أمليها
حواء : احنا لا عندنا ده ولا ده .
الشيطان : كل حاجة ليها حل وطريقة . العقول الناشفة أطريها بعقول غيرها
حواء : مين هم عقول غيرها ؟
الشيطان : الجنس الناعم الرقيق بنعرف نتفاهم معاه
حواء : هو انت اسمك ايه ؟
الشيطان : أنا اسمى ما يتسماش بس بيقولوا على بالعربى شيطان وبالانجليزى ستان
والبعض واخدين عنى فكرة غلط وبيعملوا جرائم من ورايا ويقولوا أنا السبب
حواء : وانت واقف ليه عند الشجرة دى ؟
الشيطان : ما هي الشجرة دى حجر العثرة لكل البشرية ، لأن الانسان لا يعرف كيف يستخدم الحرية .
حواء : الله حذرنا منها ، وإذا أكلنا منها حنموت ..
الشيطان : قارنى يا حواء . انتم تعرفوا الخير فقط وناقصكم تعرفوا الشر
حواء : وايه هو الشر ده ؟
الشيطان : الشر ده عالم تانى ، وليه متعة خاصة ، وأنا بعدين حأشغل فيه الحكومات والساسة والحكام ، وبعض رجال الدين وكل اللى يسمعوا كلامى .
حواء : وهما حيشتغلوا معاك نظير ايه ؟
الشيطان : قلت لك يا حواء ... متعة السلطة والشهرة والمال
حواء : انت كده شوقتنى اعرف حكاية معرفة الشر
الشيطان : الشر ده أنا مصدره وليه جاذبية خاصة عند اللى يحب الشهرة والمال والسلطة
لدرجة بعض الناس حتعمل ليهم دين خاص ودساتير وقوانين وطقوس عشان يقدروا
يسيطروا على الناس ويجمعوهم فى حظائرهم ، وأنا شغلتى أبث الفكرة .
حواء : وده امتى حيحصل ده ؟
الشيطان : ما أنا عايزك تعرفى كل حاجة وعايز أخرجك من هنا .. تشموا هواء تانى ومعرفة تانية .
حواء : طبعاً أنا زهقت من هنا .. أحب التغيير .
الشيطان : إذن على بركة الشيطان . دوقى الثمرة
حواء : إنها طعمة كالطعمية ..
ويأتى آدم
آدم : انت فين يا حواء . مين اللى بتكلميه ده ؟
حواء : كُــــل .دى حكاية طويلة أحكيها لك بعدين ، ومن بعدنا الاجيال تحكيها
آدم : مش حأختلف معاك . تعبت من المناقشة والمناهدة .
اليوم الثالث
الشيطان : شهية أوى المعصية . حتى لو تبقى خطية ..
الراجل يقع فيها . من عملتها هــى .........
وعقاب الخطية موت فى حفرة ....
وشغلتى أحفر لكل واحد حفرة
آدم : هو ايه اللى حصل . إحنا كنا عريانين مستورين
وايه اللى كشف سترتنا ومازلنا عريانين .
غطينا يا جبال . حجبنا يا زمان .
حواء : ضحك علينا اللى ما يتسماش . وقعنا فى الخطية وخالفنا الوصية
وورثنا الاجيال المعصية ...
آدم : انتى السبب يا اللى اسمك حواء ..
حواء : اناعقلى ناقص ، وعقلك كان فين يا راجل ؟!
آدم : كل راجل خرج من الجنة كانت أمامه امرأة ...
حواء : لا يا آدم . هو قال كل راجل دخل جنة حيلاقى امرأة ..
آدم : أودى عارى فين من الاجيال اللى جاية .. كل الاجيال حدتينا وتجيب سيرتنا
حواء : محدش يقدر يدينا . اللى عملناه حيعملوه وأكتر منا ، واللى يعيش حيشوف
واللى يموت حيشوف أكتر .
1 التعليقات:
جميلة اوى الحكاية دى ياريت كل الناس تتعلم منها و متديش ودانها لللى مايتسماش
إرسال تعليق