كلمات .......
" القلب هو قصر المسيح الذى يستريح فيه "
(القديس مكاريوس الكبير)
رتِّب قصرك
ميشيل رزق الله
قصرك قلبك .. رتِّب قصرك
ييجى يسوع يرتاح جوَّاه
لما يشوفه نضيف هايحبَّك
وبأنواره كمان يملاه
شيل من قلبك غيم خطاياه
تلقى الرَّب يسوع يهواه
يلقى براحه .. تزيد أفراحه
وتبقى قريب من حضن الله
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
*******
قصرك لازم يبقى مُهيأ
مترتِّب وكمان متروَّق
وان كان فيه أشياء بتعوَّق
إبدأ فكَّر .. فكَّر تبدأ
وان كان فيه جوَّاه الأردأ
نادى يسوع وف لحظه هاتبرأ
حتى ان حام حواليك إبليس
هاتكون أقوى .. هاتكون أجرأ
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
*******
كل خطايا القلب جروح
شيلها .. عيش العفه وروح
قدِّم توبه بدمع ونوح
تلقى يسوع جوَّاك والروح
تبقى سعيد بالفرح تبوح
وتلقى الحب وفين م تروح
ساعتها سلام الرب يلوح
وتلقى عبيره بخور بتفوح
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
*******
قصرك قلبك .. رتِّب قصرك
وافتح بابه لأغلى حبيب
بيه وبحبه إشغل فكرك
واذكر صلبه وأغلى صليب
هوَّ فداك بالدم وعايزك
ماتخليهش بحبه غريب
عايز حبَّك .. طالب إنك
تبقى بكلَّك جانبه قريب
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
*******
لو تدعيه يتعشَّى معاك
لو تناديه تلقاه ويَّاك
وان تهت ف زحمة دنياك
من زحمة دنياك يلقاك
ويقولك : فين قصرك يابنى ؟
إدعينى .. أنا باستنَّاك
فين قلبك قوللى ياتاعبنى
وباحبَّك .. عمرى م بنساك
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
*******
قصرك لو مليان بالحب
لازم طبعاً يرضى الرَّب
أترك كل خطايا القلب
ويَّا الحب يروح الصَّعب
إمشى طريق الله ويَّاه
ويَّأ يسوع .. ويَّاك تلقاه
يدِّى حياتك كل نجاه
واعرف إن الحب حياه
وزىِّ م قال قدِّيسنا مكاريوس
قلبك هوَّ قصر إيسوس
قصرك قلبك .. رتِّب قصرك
0 التعليقات:
إرسال تعليق