وللمشاعر كلمات .......
إجرى يانيل
ميشيل رزق الله
شُق طريقك فى سراديب العتمه
واجرى يانيل
ولا تسجنش الخطوه
وان فات جِنَّاز لشهيد الأرض
إحنى الرَّاس واتصعَّب واجرى
إغسل دمِّ الأرض
وِشَّك زى الليل الميِّت
وانت مبيِّت ف الأوجاع
إجرى .. خلِّى الطفل يعيش
طفلى يموت لو جاع
زى الشمس مرار الضحكه
زى مجال العين وسع عذابى
مِدّ عروقك واجرى يانيل
إجرى برقَّه
لسَّه طويله .. طويله
حزينه .. حزينه غناوى مدينتى
إجرى .. إجرى
غذِّى ضفاير بنتى
هايتن غضبنا يضوِّى ف حلق الليل
ويندِّى عبير الفجر على الأغصان
وبقلب نوفِّى النَّدر
ونهزّ بصوت النصر بنى الإنسان
نجنى الزمن الأخضر
زى جدود وأوائل
يلقى العالم - فى ركنه الشرير -
زمنه المتفائل
ترقص ع الأحلام مراكبنا
بس يانيل
مِدِّ فروعك واجرى
إسقى جفافى
إسقى جفافى يانيل
إسقى جفافى
أحضن توب الأرض .. أبوسه
والثوره على كتافى
إجرى يانيل
واسمع صوتى .. هِتافى
لمَّا يفك إيدين البلد الشرعيه م الأسر
لمَّا نخلِّى ولادنا يغنّوا ف كل حوارى مصر
صورة الحزن غريبه علينا
ودمع أملنا بيملا عنينا
رنِّى ياكل اجراس كنايسنا
لاجل ننوَّر حِزم النور الفاتحه
يالله نكبَّر فى مساجدنا
ونقرا الفاتحه
إنزف زيِّى يانيل
جرحى عملنى شهيد
وانت بجرح يعيد العمر من الأول وجديد
0 التعليقات:
إرسال تعليق