وَعَدْ يِجِينى
ميشيل رزق الله
وانا ناويه اخطف نجوم
واهدِيك الفَرْحه قبلك
ضَيَّعت نُص يوم
قال ايه عشان اقابلك
وف الميعاد مافيش
حبيب وعد يجينى
لا دا انت ماتساويش
ولا دمعه جت ف عينى
***
من بدرى كنت قايمه
وقلت ألِفِّ لَفَّه
قبل الكُوافير ما يفتح
على بابه كنت واقفه
علشان قبل الزحام
خلِّيته بسرعه قام
وعمل شَعرى كانيش
وبقيت حلوه تمام
وف الميعاد مافيش
حبيب وعد يجينى
لا دا انت ماتساويش
ولا دمعه جت ف عينى
***
مترو الأنفاق رِكِبْتُه
ومشيت شارع شِرِيف
ومحل كبير دخلته
نَقِّيت فستان لطيف
وعشان تشوفنى شيك
ضيعت نص يوم
كان قلبى بيناديك
ما خلاَّ ف عينى نوم
وف الميعاد مافيش
حبيب وعد يجينى
لا دا انت ماتساويش
ولا دمعه جت ف عينى
***
رِجِعْت بحلم قلبى
أقول : ألفين خُساره
لو حُبُّه قد حُبِّى
كان فَرَّح الحَيَارى
وكنت افضل جميله
الليله وكل ليله
لكن ايه الوسيله
وانت حِبَالك طويله
وف الميعاد مافيش
حبيب وعد يجينى
لا دا انت ماتساويش
ولا دمعه جت ف عينى
0 التعليقات:
إرسال تعليق