بقلم شوقى الغلبان
براءه . براءه. براءه. بالتلاتة براءه
مين المُدان. مش عارف . هو فيه من اصله خناقه
خلاص بقى فضوا الحكاية وانسوا اللى راح
وبلاش بقى حزن وكفاية اسكتوا وبلاش نواح
حقنا ضاع . دمنا ضاع مابين القاضى والشاهد
بقى هو المتهم وهو البرىْ اللى اندبح وحقه مش واخد
كان طالع بيصرخ وبيطالب بحق اللى انحرق وداره خراب
قام طلعوا عليه وجم دبحوه ولحمه اختلط ويا التراب
فينك ياعدل . فينك ياقاضى قضاة الارض
لما يتوه الحق بين البشر وياخدوا البرىء وينكشف العرض
حتى الحـكم بقى هو خصمى وطلعت انا المجرم
هاجيب منين حكام يقولوا الحق وبيننا مين يحكم
ماليش بقى غير واحد هو الامين ويرد لى دمى
علشان دا دمى مش رخيص وانا باصرخ اطّمنى يا امى
شوف التاريخ النهارده كام واتحكم على دمى بالاعدام
من الكنيسة اللى اندبح فيها ولادها ليوم ماالحق ضحّى وقام
ربك ما ينساش دم اللى راحوا بالجملة
لكن دا صابر على الفاعل اللى دبح واختفى بعد ماعمل العمله
اوعى تنسى دم مينا. ولا وائل ولا سامى او ميشيل ولا هادى
اوعى تحسب دمهم نام واندفن.الارض شربت. ودمهم يفضل ينادى
شوف كمان اللى انهرس ماعرفتش اسمه. قالوا مجهول الهوية
مين ياعينى يعرفك . فين ابوك واللا اصحابك همّا فين الاغلبية
ضم دول ويا دول تبقى وحدة . قضية واحدة ومنتهية
سنة كاملة مرت ولكن لسه ماخلصتش القضية
النهارده جاى تقول لى خلاص براءة مالحكاية هىّ هىّ
ليكى حق يا ام الشهيد اللى اندبح تحزنى بس اوعى عاللى راح
احزنى على مصر بلدك واطلبى رب العباد ييجى يضمد الجراح
بس احنا لينا اله عظيم. رب يقدر يجيب حقوقنا
نطلبه. نصرخ اليه. نرفع ايادينا اليه. يرفع الظلم من فوقنا
0 التعليقات:
إرسال تعليق