.......وللمشاعر كلمات
(فى الإحتفال بعيد الأم)
رسالة إلى روح أمى
ميشيل رزق الله
باقولها بكل الصوت المالى كل كيانى بكل الهمَّه
كُنتِ عشانى الضى الغالى أمى .. أمى ياأجمل كلمه
واحس ولما باقولها كأنى بانول أمانىَّ وفيض النعمه
أصل دى كلمة أم حبيبه عطوفه..رقيقه..نبيله..وطعمه
واما أعِدِّ حروف الكلمه كأن حروفها ثالوث معروف
والقى حياتى دنيا ف كلمه دنية حب ومافيهاش خوف
وانتِ ياأمى غبتى وروحتى وقلبى كأنُّه بعيد مخطوف
لكن رغم زمان البعد ولسَّه عليكى جريح ملهوف
(أ)
أوِّل حرف ف كلمة أمى
ألفِّ العالم ولا أتلاقى بقلب حنيِّن إلا الأم
يدِّى الفرحه بروح شوَّاقه ويشيل حزن وضعف وهم
وانتِ ياأمى غفرتى العيبه كنتِ قريبه وكنتِ حبيبه
فى عمر الطفل وعمر الشيبه يغفر قلب الأم بطيبه
أوِّل حرف ف كلمة أمى أنا أفديكى بروحى ودمِّى
علِّمتينى حروفى ف إسمى قبل العلم اللى ف مدرستى
بكل حنانك كنتِ تضمِّى وحتى راعيتى كمان موهبتى
أنا لو اعدِّ ف أحلى صفاتك والا بدأت ف وصف خِصالك
مين فى الدنيا هلاقى مثالك كان هيضحِّى تضحِيَّاتك
مهما ان قلت ومهما وصفْت إزَّاى اوفِّى بحق كمالك
(م)
تانى حرف ف كلمة أمى
والميم ماما العدرا دى أمى هىَّ القلب الحانى علىَّ
بعد م غبتى علىَّ يا أمى أمى العدرا سمايا التانيه
وبرضه كنيستى حبيبتى وأمى ماليه الدنيا من حوالىَّ
ماما العدرا وماما كنيستى أغلى م عندى واحب م لىَّ
(ى)
تالت حرف ف كلمة أمى
أما الياء ياء الملكيه يعنى يا أمى إنتِ بتاعتى
مَلِكه لكل حياتى ولىَّ حتى ان كنتى فارقتى وروحتى
ياما حاجات مطبوعه ف قلبى وحاجات ياما بتشغل بالى
وقت م كنتِ معايا ف قربى وبتدِّينى زمان يحلى لى
الله أوصانى بإكرامك علشان عمرى يطوِّل أكتر
وانا لو قادر أحيى وصالك كان إكرامى أكتر واكتر
بس اللى معزِّينى يا أمى إنك فى السما ويَّا الله
ملاك وف وسط ملايكه يا أمى قدَّام مجد الله وبهاه
عايشه حنانه وحبه يا أمى وهو الحب اللى عرفناه
ووقت م روحى تقابل روحك إحنا الاتنين نبقى معاه
نتقابل مع بعض نسبَّح ولا تشتاق أرواحنا سواه
0 التعليقات:
إرسال تعليق