صباعك يا مرسي
عيب انك ترفع صباعك في عنينا ووشنا .. احنا مش شغّالين عندك يا سيادة الرئيس .. قبل كده شفيق عملها وهدّدنا بالجيش وبيّن لنا العين الحمرا .. فكتبت له مقالا - ياريت تقراه - كان عنوانه " سيادة الفريق شفيق .. عينك حمرا " .. عشان برضه عيب انه يهدد شعب مصر بكل بجاحة ويقول لنا ان الميدان لو حد نزل فيه الجيش حينضفه في 5 دقايق .. وانت وشفيق واحد .. لو هو اللي نجح كان حيهدد فينا ويذلنا .. عشان كده قلت له عينك حمرا .. وبقول لسيادتك وفخامتك : صباعك ده " ميتحطش " في عين المصريين .. اللي انتخبوك ، وكان نفسهم تبقى رئيسهم كلهم .. وانت اخترت انك تبقى رئيس جماعتك .. وياريت حتى رئيسها .. انت بس اللي حاطينك في الواجهة .. وبينفذوا كل مخططاتهم عن طريقك .. فقبل ما ترفع صباعك وانت بتخطب وتخوفنا .. اعرف ان تمن الحركة دي غالي .. الصباع بالذات معناه عندنا مش حلو .. عارف لو هددت بكف ايدك .. تبقى مبلوعة .. انما بصباعك .. عيب .. ومش في وشنا وعنينا يا فخامة الرئيس!
خلاص خلصنا من صباعك وعرفنا " مصيره " .. ندخل بقى على الخطاب الجميل اللي انت قلته .. تصدق ، مش عارف ليه بعد الخطاب لقيت نفسي بغني اغنية شادية .. " ياختي عليه رب يخليه .. ولا يحرمني فرحتي بيه .. يسمع مني ويطمني .. وياخد من عمري ويديه .. ياختي عليه ياختي .. ياختي عليه ياختي .. ياختي عليه رب يخليه" .
.. ايوه يا ريس مرسي ربنا ياخد من عمرنا ويمد في عمر جنابك .. هو احنا عندنا أغلى منك .. مش انت ناوي تحمينا وتخلي بالك من شعبك .. وبتشكر الشرطة انها حافظت على الأمن والنظام بكل قوة بناء على توجيهاتك .. فراح واحد أمن مركزي فاتح الرشاش وقتل 10 في السويس و30 او 40 واحد في بور سعيد .. ولسه بعد خطابك الجميل بقت الإشارة خضرا و .. " عينهم " حمرا أوي .. " يزغروا " بيها نخاف ونكش وندخل العش ..
مش عارف مين قال لك انك لو ضربت جامد وقتلت وعمتنا بالغاز .. الأمور عندك حتستتب والبلد حتبقى ميت فل وعشرة .. مين ابن الغبية اللي فهّمك اننا لسه طيبين .. ناخد على قفانا ونسكت .. وتيجوا من ورانا وتعملوا حركات عيال وحا نسكت .. مين ابن الغبية " يطلع زي ما يطلع " اللي فهمك ان لا وسيلة لاستمرارك الا بالضرب والقتل؟
وبعدين تعالى قول لي .. اما انت جامد اوي كده .. ليه كان باين عليك الاضطراب الشديد وانت بقول كلمتك ، وصباعك " الحدوتة موضوع مقالي " .. كل ما يقلب الورقة يضرب في الميكرفون ويوقعه.. عشان كده عايزك تعمل جولة على تويتر والفيسبوك وتشوف شباب مصر قالوا ايه على خطابك التحذيري وصباعك " المبروم " .. وشوف أهالي بور سعيد والسويس عملوا ايه بعد الساعة 12 وانت بتفرض عليهم حظر التجوال وعايز تسحلهم بقانون طوارئك ..
على فكرة بقى اذا مكنتش تعرف فاعرفها مني .. بتوع بور سعيد والسويس بالذات رجالة جامد اوي .. جامد اوي يا مرسي .. غير حتى بتوع القاهرة اللي انا منهم .. فلو كنت فاكر انك حتقدر علينا .. فانسى انك تقدر على رجالة بور سعيد والسويس .. دول علّموا اسرائيل الادب وفرنسا وانجلترا .. فمش حيقدروا على " صباعك " .. كنت نايم بتحلم ولا بكامل وعيك وانت بتهدد الكل انك لسه عندك كتير .. وان البداية دلوقتي ببور سعيد والسويس والاسماعيلية .. ولو كلب " فتح بقه " .. عندك قرارات تانية منيلة بستين نيلة حتطرشها في وشنا .. لحد ما نعرف قيمتنا كويس ومش اى اى ولا زي زي .. ومصر مش زي تونس .. ومبارك مش زين العابدين.. ومرسي مش زي مبارك .. والشاطر مش احمد عز.. وقنديل حاجة ونظيف حاجة.. فانسوا يا شعب مصر العظيم انكم تنفذوا من تحت حكم الإخوان .. احنا جينا مش عشان نمشي .. طيب وكان علينا بإيه .. تاكسي رايح وتاكسي جاى .. وفي الآخر يخرج لنا كام عيل نقوم نسيبها .. لسه فاكر كان زمان .. كان زمان .. الله عليكي يا ست ..
نهاية القول يا ريس مرسي .. بلاش صباعك ده تاني .. مش عشانا والله .. ولكن عشانك انت .. ولحد دلوقتي بنقولك عندك فرصة ذهبية انك تلم الأمور تاني .. لو عنادك اخدك للأخر .. متلمش الا نفسك .. واخرتها حتعمل زي عبد المنعم مدبولي مش عارف في فيلم ايه .. صوابعك العشرة فوق راسك وانت بتقول انا اللي جبت ده كله لنفسي.