وللمشاعر كلمات .....
إمشى" ياسيِّد " مُرسى
ميشيل رزق الله
إمشى وسيب القصر يامُرسى ملايين مصر ماهيش عايزاك
ميادين مصر بتغلى يامُرسى بُكره النار طيلاك .. طيلاك
ماهو لو كنت رئيس بِصحيح كنت طاطيت لمطالب شعبك
كنت سِلمت من التجريح ولقيت كل الشعب يحبَّك
بس الظاهر إنَّك خايب مابتعرفش لُغات السَّاسه
فاكر إنها لعبه وحابب تروى بِدم الشهدا سِياسه
خاف من غضب الشعب وحاسب غضب الشعب تمن هنَّاتك
إمشى وسيب القصر يا مُرسى الحرِّيه تعود فى غيابك
*******
تلاتين سنه من حكم الراحل للشعب المصرى إذلال
والشعب اختارك تتساهل ماتزوِّدش مرار الحال
كان الأمل ان انت تحقق إللى الشعب افتكره مُحال
وامَّأ السُّلطه بقت ف إيديك سُقت الكدب والاستهبال
إنت يامُرسى ضميرك مات وكلامك بقى أى كلام
ومصر ماهيش بس الإسلام مصر المسيحيه واسلام
يا مُرسى الحاكم زى الأب ياخد شعبه ف حضنه بقلب
يرعى مصالحه عشان يتحب مش يرميه للموت والصَّعب
*******
ياسيِّد مُرسى كفايه الدم نهر بيجرى ف أرض النيل
كفايه يوماتى الإستشهاد عمر المصرى ما يبقى ذليل
دا مُحال إنت أو الإخوان تمحوا حضارة شعب عظيم
ثابته جدوره مع الأزمان أراضيه قبر لكل لئيم
كل النَّاس بتقولَّك إمشى لو على موتنا مش ماشيين
إسمع صوت الشعب يا مُرسى مانتش قد هتاف ملايين
إمشى وسيب القصر يامُرسى ملايين مصر ماهيش عايزاك
ميادين مصر بتغلى يامُرسى بكره النار طيلاك .. طيلاك
0 التعليقات:
إرسال تعليق