تقرير - أشرف بيومي: 
أثارت تصريحات الدكتور هشام قنديل رئيس الوزراء حالة من الجدل والسخرية بين المواطنين وخاصة مرتادى مواقع التواصل الإجتماعى والذى طالب فيه المواطنين بإرتداء الملابس القطنية وتخفيض عدد التكييفات فى المنزل الواحد وإجتماع الأسرة كلها فى غرفة واحدة لترشيد إستهلاك الكهرباء مما ادي الي استفزاز الكثير من الشعب المصري.

وانقسمت الآراء بين مؤيد يرى فى هذه الدعوات أمرا إيجابيا وشفافية ينبغى أن نساعد الحكومة على الإستمرار على نهجها ومعارض يرى أنها دعوة صريحة للتقشف ينبغى أن يتصدى لها الشعب.

وبالطبع لم يخل الأمر من السخرية اللاذعة التى يتسم بها المصريون فى مثل هذه المواقف حيث أطلق النشطاء ''هاش تاج '' هشام قطونيل '' كصفحة للتعليق على تصريحات رئيس مجلس الوزراء الذى دعا المصريين لإرتداء الملابس القطنية.

وربطت أبرز التعليقات بين تصريحات قنديل ومشروع النهضة وجماعة الإخوان المسلمين '' أراهن بكل ما أملك من ملابس قطنية إن اللي أشار‏ بالاقتراحات دي أكيد عصام العريان '' و '' ‏ نحمل التقشف والزهد لمصر (مشروع النهضة) و '' حوش النهضة اللي وقعت منك يا كابتن '' و ''‏ احب اقول لإخوانا اللي كانو خايفين من الحريه والعداله لا يلبسوهم ما هم طلعوا فاهمين الحرية صح اهو و هتبقي حريه اجباري كمان ''و '' تلاقي خيرت الشاطر داخل علي مكتب الإرشاد جايبلهم بوكسرات قطن , و لاممهم في أوضه واحده عشان ترشيد الإستهلاك ''و '' عندكوا مشكلة زبالة؟ إنزلوا لموها. عندكوا مشكلة كهرباء؟ إلبسوا قطونيل. عندكوا مشكلة ميه؟ تيمموا. الواحد مكانش عارف هيعمل إيه من غير مشروع النهضة''.

كما وجهت بعض التعليقات انتقادات مباشرة للحكومة دون سخرية '' ممكن سيادتك تلم الوزراء كلهم في اوضة واحده وتحت تكيف واحد علشان الترشيد ''و ''طب و اللى شققهم هى أوضة واحدة و بيتقطع عنها الكهربا برضه يعملوا ايه يقلعوا و يناموا فوق بعض؟ ''و ''ممكن رئيس الوزراء يطلع ملابس قطنية زيادة على بطاقات التموين ''وقال اخر '' مبارك بداها ببطلوا خلفه عيال ... ومصيلحي قال اعملوا المحشي بالمكرونه وقنديل كمل : البسوا قطن ووفروا كهرباء .. هم كلهم كده؟؟'' واشار اخر '' ‏ بيقول ترشيد الاستهلاك اجباري من العام القادم ...دا متفائل جدا متخيل اننا هنسيبه فيها لحد السنه الجايه '' و '' الحمد لله الذي من على مصر برئيس وزراء يتدخل في نوع ملابس المواطنين الداخليه، تقريبا دي الدوله العميقه''.

وقال الكاتب الصحفي ''بلال فضل'' على حسابه على تويتر: ''الدكتور هشام قنديل رجل أصولي يطالب الشعب بأن يعود إلى تلك الأيام الخوالي التي كان الذكور يجلسون بالفانلة في الصالة لأكل البطيخ''.

ومن ضمن التعليقات علي تويتر ايضا '' واحد بيقول لصاحبه حلمت أبويا الله يرحمه لابس أبيض ف أبيض حاجات قطن كده.. قاله يبقى الكهربا حتقطع عندكو النهاردة. وقال اخر '' اشتكينا من الزبالة، قالولنا انزلوا نظفوا انتوا، اشتكينا من الكهربا قالك البسو قطن، المصيبة بقى تشتكي من الصرف الصحي يقولك البسوا بامبرز!

وقال احد المواطنين تعليقا ساخرا محاكيا لاحد الاعلانات التليفزيونية المنشورة مؤخرا'' لما رئيس الوزراء يقول إن حل أزمة الكهرباء إنك تلبس ملابس قطن أحب أقوله يبقى مكانك مش هنا.

البنك الأهلي هيساعدك تفتح بوتيك وتبيع فيه براحتك وتشتغل شغلتك اللي بتحبها ''،و'' أنا من جيل شاهد إعلانات ست سنية.. سايبة المية.. ترخ ترخ من الحنفية.. حرام ياست سنية..بهدف لترشيد استهلاك المياه''،'' بما إن هشام قنديل رئيس الوزراء شايف أن حل مشكلة الكهرباء إن احنا نقعد في أوضة واحدة يبقى أكيد حل مشكلة المية ان إحنا نستحمى مع بعض''.

وعلق اخر قائلا ''مرسي اخذ مننا توفيق عكاشة وادان هشام قنديل .. عوض الصابرين يا ريس''.

وعلي غرار المشهد الذي نال قسطا كبيرا من السخرية علي فيس بوك بين مصطفي شعبان وايتن عامر قال احد الاشخاص ''هشام قنديل للمصريين''البسوا قطن..المصريين: أحبوش.. قنديل: أحبوه.. المصريين:أحبوش.. قنديل:علشان خاطر النهضة احبوه.

وقال اخر'' في السنة اللي أمريكا نزلت مركبتها علي المريخ، رئيس وزراء مصر بيطالب المواطنين أن يقلعوا ملط أو يلبسوا بوكسرات قطن ويقعدوا في أوضة واحدة''.

وعلقت أميرة أبوزيد التي أرجعت اعتراض الإسلاميين علي ''البكيني'' لأن خامته ليست قطنًا قائلة: ''لازم تفهموا أن اعتراض الإخوان علي البكيني لم يكن لأسباب أخلاقية دا عشان البكيني مش قطن''، وأضافت غادة الشاذلي: ''احنا عملنا ثورة عشان يجيلنا رئيس وزرا يقولنا اذا كنا نلبس قطن ولا كستور!''، فيما تساءلت مارينا مجدي: إيه علاقة لبس القطن بتوفير الكهرباء؟ هنلبس قطن بمراوح؟''.

وأضاف رامي محسن: سؤال مهم لرئيس الوزراء هو ينفع اللي لابسين قطن أبيض يقعدوا مع اللي لابسين ألوان في نفس الأوضة ولا كده هيبهتوا؟!'' .

وأضاف محمد سعدون: ''ملابس قطنية ونقعد سوا في اوضة واحدة!، يا بيه الحاجات اللي بتطلبها دي عيب وحرام، وبيتهزلها سبع سماوات''.

كما تداول نشطاء رسما كاريكاتيريا يصور اجتماع الوزراء وهم يرتدون ملابس قطنية تنفيذاً لمطالب ''قنديل'' حول ترشيد استهلاك الكهرباء.

وتعليقاً علي تصريح قنديل الأخير، بأن ترشيد الاستهلاك سيكون إجباريا مستقبلاً قال محمد سعد: «الترشيد العام القادم إجباري ييجي الظابط يقولك وريني البوكسر قطن ولا لأ''.

وقال ''منير سامي'': ''ملابس قطنية وغرفة واحدة ونأجر باقي الشقة لأخواتنا في غزة، وأهي لقمة هنية تكفي أبناء هنية!''.

بينما جاء تعليق واحد فقط مدافعا عن رئيس الوزراء قائلا'' بصراحة انا شايف ان الناس اوفر اوي طيب ليه خدو كلمة ملابس قطنية دي بمعني الاندروير مهي ملابس قطن ممكن تكون بجامات او تشرتات قطن''.

وفي نفس السياق قال باسل سماقية رئيس مجلس ادارة شركة قطونيل ان التصريح الاخير لقنديل الذي طالب الشعب فيه بارتداء ملابس قطنية لا يستحق كل هذه السخرية المنتشرة علي مواقع التواصل الاجتماعي متمنيا ان يسهم التصريح في تحريك سوق الاقطان في مدينة المحلة. 

( مصراوى )