نفسى أتحاكم معاه
ميشيل رزق الله
وكان قاعد على الدِّكه
وساند ع الكفوف راسه
وتايه ف الخيال وحده
وتايه حتَّى عن ناسُه
وغربان الألم كِترِت
وكانت هىَّ حرَّاسُه
وبص لدنيته بحسره
وقال بربابة الموَّال:
آه م الحياه يادنيتى
ياللى انت نارى وجنِّتى
ياقاعده فوق المصطبه
يافاكهه واقعه معطَّبه
أنا نفسى أقولك كلمتين
مش مرتاحين
دول غرقانين
فى بحار دموع
وف نار حنين
يا دنيا حارمه الطيِّبين
ياللى انت عامله مسندك من كوم تراب
غنِّيت بموال العذاب
مليون سنه قبل الميلاد
ونزلت انا ف بحر السنين
زى العباد
وقليِّلين اللى الزمن
غِفلت عينيه عن ضِحكُهم
وقليِّلين اللى القدر
خدهم صحابه اكمنُّهم
قال محظوظين
وانا م الكتار
ماطلعلناش لسَّه نهار
مش مرتاحين
حتى الكتار مشيوا على درب الأمل
نسيونى انا وحدى ف طريق ماله أمل
وفضلت مسكين فى البلد
على وش صبح نهارى حزن
واخدنى غصب
لوجود بيضحك من سنان مليانه نصب
يطلَّع منى أنفاسى
يطهَّق نفسى من ناسى
يا دنيا حارمه الطيِّبين
الصعب فيكى أسهله جوَّه الكلام
والشمس فيكى مادنه مجروحة السلام
وانا لسَّه فيكى مركبه
مكسور شراعها .. مكركبه
أنا لسَّه فيكى سُنبله
دبلانه من ريح العفن
وانا والكفن
مشوارنا قرَّب مُنتَهاه
آه ياحياه
يا ماشيه ف جنازة وفاه
يا عايشه لليل الحزين
يا عتمه نايمه ف كل دار
أنا فى انتظار المعجزه
متبسِّمه ف قلب النهار
يا ناس يا تُجَّار الوجع
لو تِسمَعُونى أقول : جدع
قولوا : يا غارق ف الدلع
إنت لا عتره ولا جدع
يا ناس أيا كلاب الليالى معفَّره
الدنيا لو اعيشها معاكم مسخره
فى الضلمه يحلالى القعاد
ولا اعيش فى كدبه منوَّره
هوِّبت ناحية حيُّكم
وعنىَّ فى قلب الكلام غنوة سُكات
والكلمه لو نطقت حروفها شفِّتى
تِفرش ورود على أرضكم
حيِّيت عليكوا ف سِكِّتى
وبلهفتى
مالقيتش رد ف حيُّكُم
وانا مِنُّكم
قلبى يا نايم ع الحصيره بمسكنه
يا للى انت ياما جريت وراهم تجربه
والشَّق بيجرَّح حيطانك دوِّبك
آه يا فريسة عقربه من نسل آدم
يا للى انت عالم بالجدع صاحبك يا عينى
سوَّاح بالف بلاد كتير زى الأجير
لكن على حمارى الرمادى المُشكِله
عرجان وحاله بالبلا
كان الحمار ده ف يوم حصان
كان الحصان أبيض جميل
يجرى كما عمر الصِبا
يرقص كما البنت الغازيه المُلعبه
أنا طرت بيه زى الأمير
وفضلت اطير واطير واطير
لحد م لقيتنى ف ديار غير الديار
لحد م انحطّيت فى دوَّامة قرار
غابه وفضا ورجع الصدى
واتارى دى جزيرة عدم
آه يا ندم يا دنيتى
يا دنيا حارمه الطيِّبين
السيف على رقبتى انكسر
والذنب مش على ذِمِّتى
كل الحكايه انى أنا
مظلوم وعارف سِكِّتى
باحمل قناديلى واسير
لكن بتطفيها الهموم
وبتطفى دمعة مسكنه
بتنز من عين النجوم
أنا نفسى أتحاكم على إيدين محكمه
لكن فى أشرف محكمه
فلربما أطلع برئ
0 التعليقات:
إرسال تعليق