جوّه نفسى
ميشيل رزق الله
الأمل أشجاره عاليه
مسكِتُه باليد غاليه
لازم اهزم فىّ يأسى .. جوّه نفسى
أطلب الخير والنهار
واندهك يا إزدهار
تبقى دُنيايا وعُرسى .. جوّه نفسى
أحلم الحلم الكبير
يبقى حُبّ الكون كتير
دا ما كانشى فىّ منسى .. جوّه نفسى
أشتهى تعب الغلابه
والعب الناى والربابه
فرح يومى .. حزن أمسى .. جوّه نفسى
إشتياقى لألف رِحله
رايحه للدنيا اللى أحلى
والعسل م النحل درسى .. جوّه نفسى
خوف كيانى ع الأمان
من قساوتك يا زمان
والميزان طابب ببأسى .. جوّه نفسى
صوتى لو حاله السكينه
بين حناجر مُستكِينه
لازم اصرخ يعلى حسّى .. جوّه نفسى
دنيتى لو بحر هايج
يوم مسيرى منه خارج
والإيمان مركب بترسى .. جوّه نفسى
يا ربيع الدنيا خايف
ييجى بُكره بالمخاوف
ياللاصبّح .. ياللا مسّى .. جوّه نفسى
0 التعليقات:
إرسال تعليق