مش هاسيبك يامصر ابدا انا مش هاسيبك
لوقلتى امشى . من مشيتى ايه راح يفيدك
بصّى فى تاريخك مين اصله ابنك ومين وليدك
للغربة والبعد عنك فكّرى . ده مستحيل دانا من هنا
من طنطا يمكن م البحيرة من سوهاج او من قنا
جيت من هناك ماشى باعد الفلنكات ودا كله فاكره من سنه
قالوا تعال معانا ضم صوتك ويا صوتنا ننتخب
رحنا وقلنا نفسنا يبقى لنا راجل مننا منتخب
ورجعنا بعد ما بانت العلامات بكينا وقعدنا ننتحب
برضه انا مش هاسيبك .عارفه ليه؟عشان انا حبيبك
وبقولها تانى الف مرة .وفى كل مرة برضه انامش راح اسيبك
عارفه يامصر اناليه باحبك بالشكل دا وليه العجب
عشان ترابك غالى علىّ وميّتك على قلبى لولى ودهب
اسالى سينا وترابها اللى دمى فيها ما انشرب
قالوا لى ياللا روح شوف لك مكان وفيه انزوى
قلت ماليش غير نيلك من ميّته وحبك انا بارتوى
مش ممكن امشى وابعد بعيد عنك ده انا باحبككككك قوى
عايزانى ارحل واشد على ظهرى واسيبك
بالرغم منى دانا مسنودفى ظهرك .دانا حبيبك
حتى لو نطقتيها بشفايفك والوجع كان من نصيبك
مش ممكن ارحل وانكوى بنار البعد ياقلبى
داانتى اللى فى الدنيا طلعت بيكى من ربى
هاموت هنا.واندفن انا. ويا جدودى اللى من زمان
ماتوا هنا وعظامهم لسه شاهده وعظامى تنضم ليهم فى نفس المكان
عشان حياتى كانت هنا وعشت فيكى وانا حاسس بالامان
بالرغم انى عايز ابقى فيكى لكنى بانطرد من ارضى محروم م الحنان
قوليها ياامى بلوعتك وبخوفك ماهو انتى مغصوبة
قوليها ارحل عشان ترضى الغلان ماهو انتى مغلوبه
قوليها ارحل ماانا عارف كلمتك من ورا قلبك يامحبوبة
عايزانى ارحل. قوليها لو انتى عايزة كده وانا هارحل
عايزانى ارحل. انسى اللى كان بيننا. وانا ارحل
عايزانى ارحل. انا هارحل بس هارجع لك قبل ما اوصل
م: شوقى الغلبان
1 التعليقات:
الله الله الله ايه الجمال ده
إرسال تعليق